મઝ્ઝાનું સપનું....

મમ્મા,કાલે તો મને સપનું આવ્યું 'તું.....
એવું મઝાનું સપનું કે ના પૂછો વાત....
સપનામાં તો મારી ચાલુ થઈ ગઈ છે સ્કૂલ
પણ વર્ગ હતા માત્ર સાત....
પહેલો વર્ગ ભગવાન ને પ્રાર્થનાનો ને
બીજો આખી સ્કૂલ સાથે વાત..
ત્રીજો-ચોથો વરસાદનો ને સાહેબે
કરી મેઘધનુષ્યની વાત...
પછી પડી રિસેસ,તો ય ચાલુ વરસાદ...
નહીં તો -કોરો તડકો થાત...
પાંચમામાં ઊડ્યાં પતંગિયા ને જોઈ
ફૂલોની રંગબેરંગી ભાત..
છઠ્ઠામાં સાહેબે સાંભળી
બધાની રજાઓની વાત..
ને એં...સાતમામાં તો બધાને આપ્યું લેશન..
"જાવ,છોકરાંઓ..કાલે ચિતરી લાવજો વરસાદ .."
આટ્લું કહ્યું ત્યાં તો મારી ઊઘડી ગઈ આંખ..
મમ્મા,કાલે તો મને સપનું આવ્યું 'તું એવું મઝાનું સપનું ,
કે ના પૂછો વાત.....

પંચમહાતત્વ...

રસ્તો બનીને આંખમાં પથરાતી.....પ્રતિક્ષા....

ભડકો બનીને પોતે જ બળતી....પ્રતિક્ષા.....

વરસાદ બનીને અંતરમાંથી ઉભરાતી ....પ્રતિક્ષા.....

સુગંધ બનીને અંતરમાં મહેક્તી...પ્રતિક્ષા....

ફલક બનીને આંખમાં વિસ્તરતી...પ્રતિક્ષા.....

શિ.

the first word of each line is a symbol of PANCHMAHATATVA..i.e.prithvi,agnee,water,vaayu and aakaash..and the word PRATIKSHA is a symbol of AATMA- SOUL.

વિરહિણી....

ફૂલગુલાબી ફાગણ ને સાજણ તારા વાયદા...
ખીલી ઉઠવાની મૌસમ ને સાજણ તારા વાયદા....
મ્હોરી ઉઠ્યા આંબા ને સાજણ તારા વાયદા..
ધગધગતા વૈશાખી વાયરા ને સાજણ તારા વાયદા....
અષાઢી વાદળાના ાઅણસાર ને સાજણ તારા વાયદા...
વરસાદી માટીની ગંધ ને સાજણ તારા વાયદા...
આઠમની માઝમ રાત ને સાજણ તારા વાયદા...
માગશરમાં ઢબૂકતા ઢોલ ને સાજણ તારા વાયદા...
ફૂલગુલાબી મૌસમ ને સાજણ તારા વાયદા....
શિ.

તડકો ....

તડકો તળાવમાં ધૂબાકા મારે
તો ય પરસેવે ન્હાય!!!
કોઇક તો એને ઠારો 'લ્યા,
એ બચ્ચાડો ક્યાં જાય!!!
આ તારામઢ્યું આકાશ ઓઢાડો એને...
જે થોડી ઠંડક થાય...
થોડી બીજની ચાંદની પાવ..
કંઠને રાહત થાય...
તડકો બચ્ચાડો સાવ ઓશિયાળો,
કોઇ ના એની દયા ખાય...
એ ય ને..તડ્કો તળાવમાં ધૂબાકા મારે...
તો ય પરસેવે ન્હાય!!!!
shi.

હયાતીના હસ્તાક્ષર...

રોજ સવારે સૂરજ દેખાય તે તારી હયાતીનાં હસ્તાક્ષર નહિ તો બીજું શું?
નહિ તો ,આ રૂ જેવા વાદળામાં પાણી કેમ ભરાય તે મને કહે તું..
સમયાન્તરે મૌસમ બદલાય તે તારી હયાતીનાં હસ્તાક્ષર નહિ તો બીજું શું?
નહિ તો ,આ મેઘધનુષ અર્ધગોળાકાર જ કેમ થાય તે મને કહે તું...
ફૂલછોડ્માં રંગોળી પૂરાય તે તારી હયાતીનાં હસ્તાક્ષર નહિ તો બીજું શું?
નહિ તો,આ કોચલામાંથી પતંગિયા કેમ ઊડી જાય તે મને કહે તું..
જન્મનો માર્ગ મ્રુત્યુ સુધી જ જાય તે તારી હયાતીનાં હસ્તાક્ષર નહિ તો બીજું શું?
નહિ તો,ચોર્યાસી લાખ ફેરા પૂરાં કેમ કરીને થાય તે મને કહે તું.........
શિ.

મારા સમ....

ચાલ,મોગરાની ઉઘડતી કળી બની જઈએ..
વરસાદના સમ....
ચાલ,લીલુછમ્મ પાંદડુ બની જઈએ...
વરસાદના સમ...
ચાલ,ભીની માટીની મહેંક બની જઈએ...
વરસાદના સમ..
ચાલ,પંખીનો ટહૂકો બની જઈએ...
વરસાદના સમ...
એના કરતાં ચાલ...વરસાદ જ બની જઈએ...
મારા સમ...
શિ.

સ્નેહ..

તું વાદળ બનીને વરસી જો,
હું દરિયો બનીને તરસી જોઉં...
તું ચાતક બનીને તરસી જો,
હું વરસાદ બનીને વરસી જોઉં...
તું મોર બનીને ટહૂકી જો,
હું ટહૂકો બનીને વિસ્તરી જોઉં..
તું પ્રેમ બનીને ટપકી જો,
હું પ્રાણ બનીને ધબકી જોઉં...

શિ.